تجهيز الدبش

15 Feb

اول ماتبدأه العروسة بعد الاحتفال بخطوبتها هي التفكير في الدبش وشراء مستلزماتها اللي تحتاجها في حياتها الجديدة مع شريك حياتها.. وانا البنت بنت أمها اللي ماتعرف هذه الحركات ولا قد شافت دبش قريباتها او زميلاتها، كل اللي اعرفه اني المفروض اروح السوق 😕 اش اشتري بالزبط ما أدري.. فاكتشفت اني المفروض اسأل شخصة متزوجة.. فكان السؤال: من هي؟؟؟

بالرغم من اني استقبلت الكثير من المعلومات من صديقة ومن قريبة ومن عازبة ومن متزوجة لكني لم استطع الاستيعاب والتجميع لكوني دقيقة في المشاريع وأحب التفاصيل ولكونهم يستخدموا طلاسم لم أفهم مقصدهم منها.. كنت على ذلك الحال حتى عزيمة اجتمعوا فيها زميلاتي من المتوسط ووجدت منهم صديقتي أم يوسف المرأة التي فهمت طريقة استيعابي وبراءة جهلي واللي تشجعك انك تسألي عن أي مجهول بصراحة وبدون إحراج، وضحتلي تفاصيل الأمور بالالوان والعدد والانواع والطقوس سهلت عليا مشوار الألف سؤال.. وبعد مافهمت، أخيراً اتحمست ورتبت افكاري واحتياجاتي ورسمتها في برنامج لرسم الخرائط الذهنية أحببت ان اشاركها معكم ومع كل عروس جاهلة زيي

🙄

الدبش

كان الدبش بالنسبة لي كمشروع يجب تنفيذه قبل موعد الزواج.. لا اقول انها خريطة افتراضية، قد تكون مبالغة عند البعض او غير شاملة عند البعض الآخر.. نعم، فقد نصحني الكثير بشراء مستلزمات لاتهمني ولن احتاجها يوماً فلم اكتبها هنا ولكنها قد تكون مهمة عند غيري، واشياء اخرى اكتشفت اني احتاجها اثناء ذهابي للسوق فاضفتها 🙂 وكل واحد يقوم على الجنب اللي يريحه

اقترب الموعد وبدأت الاغراض تتكدس في الغرفة وبالكاد افتكر اش اشتريت واش باقيلي من الخريطة.. وحتى تلك اللحظة، فإذا بالناس تردد حولي: خلصتي الدبش؟ كيف حتغلفيه؟ متى نجي نساعدك؟ اشتريتي كراتين وعلب وشنط سفر؟؟ ياويلي هناك مشروع اخر يسمى بتغليف الدبش وهذا ليس من ميولي.. لدرجة انه جملة “لا كيف ما تغلفيها؟ احلى لحظة لمن تغلفي دبشك وحتفتكريها بعدين وتقوللي يااااه ذكريات حلوة” صارت كالصدى تتردد في اذني من كل مكان.. فاستسلمت للواقع وقلنا على بركة الله وفتحنا خريطة تانية عشان نرتب الافكار والمعلومات في مكان واحد

😉

Photo 3-7-13 4 59 47 PM

تناقلت الثقافات واصبح من المعتاد ان يحصل اتفاق بين اهل العريس والعروسة لتحديد يوم معين لنقل أغراض العروسة من بيت اهلها الى بيتها المستقل.. فتبدأ ابداعات البعض في طريقة تقديم الاغراض وتزيين (العفش) بطريقة جمالية تفتخر بها أم العروس امام اهل العريس.. وتتطور الابتكارات في طرق تخزين الاغراض ووضعها بطريقة انيقة في أرجاء بيت العروس.. فحبيت اشارككم دبشي اللي الحمد لله خلصته وجهزته ونقلته ليلة الأمس الى بيتي الصغير الكيوت

🙂

طقم شنط السفر

اول ما يجب توفيره طقم شنط السفر عشان تقسمي أغراضك فيها، كل ما تشتري شي فرغيه في الشنط وجمعي الاكياس الحلوة مع بعض << هوايتي الغريبة 😛 الطقم عادة يكون ٤ أحجام، بس انا حبيت ابو ٥ أحجام مع طقم شنطة اليد عشان الكشخة وكدا.. عاد شوفي انت اش اللي يناسب ميزانيتك وشوفي كم شنطة تحتاجي تستخدميها عشان حتنقلي فيها معظم دبشك..

طبعاً اول شي يتحط في الشنط الملابس، والملابس منها اللي حتعلقيه في دولابك واللي حتطبقيه.. فحتشتري علاقات ملابس بانواعها تناسب تنوع ملابسك اللي حتعلقيها.. وللخصوصية والتميز الانثوي، فضّل الكثير شراء اكياس خاصة اشتريتها من سوق البلد بجدة من محل بانافع للتجارة – لها احجام مختلفة – تغطى بها الملابس لتعطي للدبش منظر موحد انيق يعكس زوقك وشخصيتك..

تعليق الملابس

وقد شطحت أفكاري قليلاً عند استطلاعي على ابداعات مهجة.. فلما لقيت عندهم اختراع لطرق تعليق الملابس في الدولاب بطريقة تخزين ملابس اكثر في مساحة أقل، قررت اني اعلق شنط اليد في علاقات واحطها في الدولاب، بدل تخزينها في الادراج.. ففكرت باستخدام علاقات القطن لتعليق الشنط وترتيبها في تعليقات مهجة ثم تلبيسها بالحجم الصغير من اكياس الملابس وتقديمها مع الملابس المعلقة.. بالرغم من اني لمن انفذ الفكرة لسبب ما بس اتمنى انها تعجبكم 🙂

تعليق مهجة

أما بالنسبة للملابس المطبقة، فنصحوني اني اشتري ورق مقوى واقصقصه بأحجام مناسبة يساعدني في عملية تطبيق الملابس ويطلع التطبيق مرتب وكله قد بعض فيسهل تغليفها ووضعها في الدولاب..اما بالنسبة لملابس النوم ففضلت الاحتفاظ بها في اكياس الملابس بأحجام صغيرة وانواع مختلفة.. استخدمت تقنية ورق المقوى مجدداً هنا لتشعرني انني انسانة مرتبة 😀

الملابس المطبقة

الورق المقوى في الأكياس

أكياس الملابس الصغيرة

وبما انه الملابس الداخلية تتحط في ادراج الدولاب او الشفنيرة، حطيتها في اكياس صغيرة للخصوصية واشتريت مقسم قماشي للادراج لترتيبها بانواعها، واضفت مقسم آخر للشراريب والكرفتات وقفازات وماشابهها من اكسسوارات.. وبكدا خلصنا من موضوع الملابس 🙂

تقسيم الأدراج

ثاني مايهم العروسة تسريحتها (التسريحة هي الطاولة اللي يجي معاها مرايا، مشتقة من “تسريح” الشعر ومعناه تصفيفه وتمشيطه، والمقصود اصطلاحاً الطاوله اللي تتجهز فيه المرأة لتكون بكامل زينتها) 😛 اول محتويات التسريحة المكياج، وقد اعتاد الناس تقديمها في سلات وبعضهم يكتفوا بشنط المكياج الكاملة، اما انا فاحتاج حاجة مرتبة مقسمة قدامي على التسريحة اشوف كل شي قدامي حتى يسهل الاختيار، فـ راق لي علب المكياج الشفافة بمختلف الاشكال والتقسيمات..

المكياج

وبالنسبة لما يخص زينة الشعر، فاشتريت مقسم شفاف للادراج من ساكو ورتبت فيها اغراضي.. اما طوكات وامشاط وفرش الشعر فاكتفيت بوضعها عشوائياً في مزهرية قزاز من ايكيا.. بالنسبة للاكسسوارات، فريحت نفسي ما اشتريت علب ساعات واساور ولا شماعة سلاسل واخراص، اشتريت دولاب خاص مقسم لكل انواع الاكسسوارات وعلى بابه مرايا لرؤية شاملة بعد اكتمال الزينة.. وبما ان المرأة مخلوق ناعم بالكريمات وفواح بالعطور، لم تخطر ببالي اي فكرة جديدة لوضع الكريمات والعطور فوضعتها في سلال مناسبة لألوان غرفة النوم وسمع الله لمن حمده..

زينة الشعر والعطور والكريماتالاكسسوارات

بالنسبة للأحذية – اكرمكم الله – فهناك الكثير من الافكار.. منهم من يضعها في اكياس ورقنز، أو في علب شفافة.. ولكني انسانة ما ابغى أصرف فلوس في اكياس وكراتين وبعدين بعدما نرتب الجزم في دولابه تتركن على جنب وانا ما حأحتاجها في شي تاني.. فريحت نفسي برضو واشتريتللي دولاب الجزم المقسم << كل شي عندي مقسم خخخخ.. فيه منه الاسود والبمبة والابيض والوان اخرى، وفي منها احجام يشيل ٢٠ جزمة ومنها ١٥ ومنها ١٢ جزمة..

الجزم

جرت التقاليد انه العريس يجهز الشقة ويشتري جميع احتياجات الحياة ولكن بعض منها كشراء شراشف الصلاة وسجاجيدها و تجهيز الحمام الخاص بالزوجين وشراء لحاف السرير حق اول يوم يناموا فيه العروسين فتكون على العروسة.. وفي بعض العائلات، تساعد العروس زوجها ان ارادت في تجهيز المطبخ وادواته بما انه المطبخ هو الغرفة الثانية للمرأة..

تختلف الشراشف ونوعيتها حسب ما اعتادت العروسة عليه، قد يرى البعض انه من الافضل شراء طقم سجاجيد بشكل واحد وشراشف بشكل واحد ولكن باختلاف الوانها، والبعض يفضّل شراء طقم شرشف وسجادة بنفس الشكل والزينة ونوعية القماش، برضو حابة تشتري شراشف مشكلة وسجاجيد مشكلة انت حرة برضو 😛 في النهاية حيتنقل جميعها في صندوق خاص ويوضع في غرفة الضيوف الحريم..بالنسبة للحاف السرير، فالسوق مليء بطقم لحف السرير تكون معاها بطانية ومخدات فقط وبعضها معاها مخدات صغيرة وعلبة المنديل وصندوق المهملات.. فبالرغم من شراء العريس للّحاف ويكون مفروش على السرير، بس هي حركة انه اهل العروسة لمن يدخلوا الشقة يشيلوا فرشة السرير العادية ويحطوا فرشتهم البيضاء المزركشة الرومانسية.. اما تجهيز حمام العروس، تلاقي في اماكن زي “بيتي الصغير” و”بيت العروس” الوان واشكال كثيرة تخدمك انك تجهزي الحمام من السقف لحد البلاط.. ومنها دولاب الحمام اللي تحطي فيها اغراضك – واغراضه – الشخصية وترتيبيها في سلات او حسب ذوقك.. ولا تنسي تشتري طقم الروب الثنائي مع المناشف لتقديمه مع اغراض الحمام..

الدبش الإضافي

بكدا نكون انتهينا من ترتيب الدبش، واذا زاد عليك حاجة منتي عارفة فين تحطيها، يا كثر الكراتين في البلد اختاري وعبي واخلصي.. عاد شغل التل والورود والشرايط من زينة الحياة الدنيا، فغلفي دبشك باللون اللي تحبيه وللا بلون غرفة النوم حقتك وصوريه وبروزيه وحطيه ارشيف للذكريات

الدبش

لمن يهمه الأمر
ـ الاماكن اللي زرتها في مكة هي: مكة مول، الشرايع مول، سوق المجاز، سيتي ماكس، هوم سنتر، اسواق العتيبية، اسواق شارع المنصور، اسواق شارع الستين، سوق الضيافة، بيت العروس،
ـ الاماكن اللي زرتها في جدة هي: البلد، سوق الصحيفة، ايكيا، ساكو، سوق الشاطئ، مجمع دانة

Advertisements

16 Responses to “تجهيز الدبش”

  1. سما March 8, 2013 at 6:24 pm #

    تدوينة لطيفة وجدًا رائعة وجميلة.. شكر ا جزييلًا عليها

  2. صارخ بصمت March 8, 2013 at 6:39 pm #

    ألف ألف مبروك يا عروسة

  3. Shemosomi March 8, 2013 at 7:02 pm #

    ماشاء الله حمستيني صراحه اتزوج بس عشان أروح اشتري عفش جديد وأرتبه
    الله يوفقك يا رب وعقبال ما تعرضي صور بزورتك

  4. eng.makkawi March 8, 2013 at 8:51 pm #

    مليووووون مبروك لك ياعررروسه موفق والله مدونه حلوووه تسلمووو ياخيتووو منه المال ومنك العيال ،الله يتمم عليك بي الخير يااا رب يابنت مكه.

  5. نووني March 13, 2013 at 2:29 am #

    ياحياتي الله يسعدك يارب دنيا واخخره بجد ممرا عسووله وتحبي الخخير للناس وترا احنا جيرانكم ف الطايف قريب من مكه وتقريبا نفس العادات وكككل شئ الله يوفقك ييييارب والف مبروك ياعسل

  6. سمر July 16, 2013 at 3:09 am #

    بسالك من وين اشتريت اكياس الملابس ؟؟؟؟ ضرررررررروري

  7. ghadeer kja September 16, 2013 at 7:00 am #

    يا حبي ليكي و لحكاياتك.. ماعرف كيف وصلت هنا لكن تهاويل الدبش والنفسيات الي سايرتلي بسببه هي الي وصلتني هنا..

    انا عروس مقبلة عالزواج وفرحي قريب ان شاءالله بعد شهرين.. كل يوم احووس وادور في النت على مواضيع الدبش وخرابيطه وكل يوم ازداد في استياء..
    اليوم بالصدفة دورت في عم قوقل على الدبش وطلعتلي مدونتك.. وصراحة انبهرت في خريطة الدبش الي عاملتها واتترفزت انو حسيتها مرة زحمة وطلعتلي كتير اشياء ناقصتني هي هي هي xD

    عموما.. شوووكرن عالمدونة الجميلة.. شوون عالخريطة المفيدة والله يوفقك في حياتك وان شاءالله حاطفشك بمتابعتي ليكي 🙂

    • Tuta November 29, 2013 at 11:30 pm #

      العفو يا قلبي.. ومبروك عليك الزواج ربي يوفق بينكم ويجمع بينكم على خير.. مرحبابك في مدونتي اي وقت 🙂

  8. الاء November 20, 2013 at 2:16 am #

    ماششاء الله تبارك الله .. مررة حلوة اكياس الملابس من فين ؟

    • Tuta February 8, 2014 at 11:14 am #

      اشتريته من البلد من محل صغيييير بس مشهور اسمه بانافع للتجارة.. كل تغليف الدبش اخذته من هناك =)

  9. None January 12, 2014 at 2:25 am #

    ماشاء الله جداااااااااً رائععععععععععععه ””” شكرااااااً

  10. nnnnn January 31, 2014 at 5:04 pm #

    ماشاء الله روووووعه اللله يهنيكي حبيبي بسالك من فين الاقي اكياس الملابس الطويله
    المعلقه

  11. jonakhaled May 20, 2014 at 3:37 am #

    الله يسعدك و يريحك زي ما ريحتيني , انا حاولت اني اعمل خريطة من اول بس ما جمعت و لا نص الاشياء اللي انتي مجمعتها 😐 , و كنت احسب اني مخلصة و طلعت تلات ارباع الاشياء ناقصة و ما بقيلي الا شهر واحد بس 😦 شكرا يا قلبي

  12. bnan July 4, 2014 at 5:55 pm #

    السلام عليكم
    والله افدتيني كثير
    الله يوفقك بحياتك وشو سميتي بنوتتك
    واتمنى تكوني صديقتي

  13. afkar2013 March 7, 2015 at 3:35 pm #

    ماشاء الله تنظيمك جميل ، الله يوفقك يارب

    http://www.afkar2013.wordpress.com/

  14. norah May 2, 2015 at 2:19 pm #

    ما شاء الله لا قوة الا بالله 😍
    تفكيرج نفس تفكيري كنت ابي اعرف كل شي بالتفاصيييييل
    انا عروس من الكويت وبنجي في رمضان لجدة عشان اجهز واحتجت اعرف المحلات وكل شي
    و البوست مفصل ماشاءالله
    أحس الوقت مايكفيني خصوصا أنه اللحين اختبارات واخلص اول يوم في رمضان بالضضبط وعرسي 2 ذو القعدة 💔
    يعني قدامي بس رمضان وشوال عشان اجهز 😢 الله يستر

قلنا رأيك ^_^

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

%d bloggers like this: